Voices & Verses ကို ဖန်တီးဖြစ်ခဲ့တဲ့အကြောင်း

ကျွန်မလူငယ်အရွယ်တုန်းက မြန်မာနိုင်ငံရဲ့ နိုင်ငံရေး၊ စီးပွားရေး၊ ပညာရေးနဲ့ ကျန်းမာရေးအခြေအနေတွေက တဖြည်းဖြည်း ဆိုးရွားလာခဲ့တယ်။ ၈၈ အရေးအခင်း၊ စစ်အာဏာသိမ်းမှုနဲ့ ပဋိပက္ခတွေကြောင့် ကျောင်းတွေနဲ့ တက္ကသိုလ်တွေ ပိတ်တယ်။ လူငယ်တွေရဲ့ အနာဂတ်လည်း မရေမရာ ဖြစ်လာခဲ့တယ်။

အဲဒီအချိန်မှာ ကျွန်မလည်း ဘာဆက်လုပ်ရမလဲ မသိခဲ့ဘူး။ ကိုယ့်ရှေ့မှာ လျှောက်စရာလမ်း မရှိတော့သလို ခံစားရပြီး အနာဂတ်အတွက် မျှော်လင့်ချက်လည်း တဖြည်းဖြည်း လျော့ပါးလာခဲ့တယ်။

တစ်နေ့မှာတော့ "ထိုင်ပြီး စိတ်ပျက်နေမယ့်အစား" ဆိုတဲ့စိတ်နဲ့ ဦးလေးတစ်ယောက်ရဲ့ စာအုပ်စင်ပေါ်က အကျိုးပြု စာအုပ်တွေကို တစ်အုပ်ပြီးတစ်အုပ် ယူဖတ်ဖြစ်ခဲ့တယ်။

စာအုပ်တွေက ကျွန်မရဲ့ ပြဿနာအားလုံးကို ဖြေရှင်းပေးခဲ့တာတော့ မဟုတ်ဘူး။ ဒါပေမယ့် တစ်ခါတလေ စာအုပ်တစ်အုပ်က ဆရာတစ်ယောက်လို သင်ပေးခဲ့တယ်။ တစ်ခါတလေ မိတ်ဆွေတစ်ယောက်လို အားပေးခဲ့တယ်။ ကိုယ့်ကိုယ်ကိုယ် ရှင်းရှင်းလင်းလင်း မမြင်နိုင်တဲ့အချိန်မှာ မှန်တစ်ချပ်လို ကိုယ့်အတွင်းစိတ်ကို ပြန်လည်မြင်တွေ့စေခဲ့တယ်။ ကိုယ်မရောက်ဖူးတဲ့နေရာတွေ၊ မတွေ့ဖူးတဲ့လူတွေနဲ့ မကြုံဖူးတဲ့ ဘဝအတွေ့အကြုံတွေကိုလည်း စာမျက်နှာတွေကတစ်ဆင့် သိခွင့်ရခဲ့တယ်။

စာဖတ်ခြင်းက ကျွန်မကို အသိပညာပေးရုံသာမက ကမ္ဘာကြီးကို ကြည့်မြင်တဲ့အမြင်ကိုလည်း ကျယ်ပြန့်စေခဲ့တယ်။ ကိုယ့်အမြင်တစ်ခုတည်းနဲ့ လူတစ်ယောက်ကိုဖြစ်စေ၊ အဖြစ်အပျက်တစ်ခုကိုဖြစ်စေ မဆုံးဖြတ်သင့်ကြောင်း ပိုမိုနားလည်လာခဲ့တယ်။ ကိုယ့်နဲ့မတူတဲ့ ယုံကြည်မှု၊ ယဉ်ကျေးမှုနဲ့ ဘဝနောက်ခံရှိသူတွေရဲ့ အသံကို နားထောင်ဖို့၊ နားလည်ဖို့နဲ့ လေးစားဖို့လည်း သင်ယူခဲ့ရတယ်။

ဘဝခရီးမှာ မေးခွန်းတွေ၊ စိတ်ပျက်အားငယ်ရတဲ့အချိန်တွေ၊ ရှေ့ဆက်ရမယ့်လမ်းကို မမြင်နိုင်တဲ့အချိန်တွေ ရှိခဲ့တယ်။ အဲဒီလိုအချိန်မျိုးမှာ စာအုပ်တစ်အုပ်ထဲက အတွေးတစ်ခု၊ စာကြောင်းတစ်ကြောင်း၊ ဒါမှမဟုတ် လူတစ်ယောက်ရဲ့ ဘဝဇာတ်ကြောင်းတစ်ပုဒ်က ကျွန်မကို စိတ်ဓာတ်ခွန်အားနဲ့ မျှော်လင့်ချက် ပေးခဲ့တယ်။ အနာဂတ်အတွက် ကြိုတင်ပြင်ဆင်နိုင်အောင်လည်း လမ်းညွှန်ပေးခဲ့တယ်။

စာဖတ်လေလေ ကိုယ်သိထားတာထက် မသိသေးတာတွေ ပိုများနေသေးကြောင်းလည်း နားလည်လာခဲ့တယ်။

ကျွန်မအတွက် အကျိုးရှိခဲ့တဲ့ အတွေးတစ်ခုဟာ တခြားသူတစ်ယောက်အတွက်လည်း အသုံးဝင်နိုင်တယ်။ ကျွန်မကို ခွန်အားပေးခဲ့တဲ့ စာအုပ်တစ်အုပ်ရဲ့ သင်ခန်းစာဟာ မျှော်လင့်ချက်လိုအပ်နေသူတစ်ယောက်အတွက် အားပေးမှု ဖြစ်လာနိုင်တယ်။ ကျွန်မကို ဘဝအကြောင်း ပိုမိုနားလည်စေခဲ့တဲ့ အသိပညာနဲ့ အတွေ့အကြုံတွေဟာလည်း တခြားသူတစ်ယောက်ရဲ့ ဘဝခရီးအတွက် အလင်းရောင်တစ်စင်း ဖြစ်လာနိုင်တယ်။

အဲဒီယုံကြည်ချက်ကပဲ Voices & Verses ကို ဖန်တီးဖြစ်စေခဲ့တာပါ။

Voices & Verses မှာ ကျွန်မ ဖတ်ရှုလေ့လာခဲ့တဲ့ စာအုပ်တွေကနေ ရရှိတဲ့ အတွေးအမြင်နဲ့ သင်ခန်းစာတွေ၊ ယုံကြည်ခြင်းနဲ့ ဝိညာဉ်ရေးဆိုင်ရာ ဆင်ခြင်မှုတွေ၊ အတုယူလေးစားဖွယ် လူပုဂ္ဂိုလ်တွေရဲ့ ဘဝဇာတ်ကြောင်းတွေ၊ နေ့စဉ်ဘဝအတွက် အသုံးဝင်မယ့် အသိပညာတွေနဲ့ လူမှုဘဝ၊ ယဉ်ကျေးမှုဆိုင်ရာ မတူကွဲပြားတဲ့ ရှုမြင်ချက်တွေကို မျှဝေသွားချင်ပါတယ်။

ဒီနေရာမှာ မျှဝေတဲ့ အတွေးအမြင်အားလုံးကို စာဖတ်သူတိုင်း သဘောတူလက်ခံဖို့ မမျှော်လင့်ပါဘူး။ ဖတ်ရှုဖို့၊ စဉ်းစားဆင်ခြင်ဖို့၊ မေးခွန်းထုတ်ဖို့၊ မတူညီတဲ့အသံတွေကို နားထောင်ဖို့နဲ့ ကိုယ့်ဘဝအတွက် အဓိပ္ပာယ်ရှိတဲ့အရာကို ကိုယ်တိုင်ရှာဖွေဖို့ နေရာတစ်ခု ဖန်တီးပေးချင်တာပါ။

ကျွန်မအတွက် Voices & Verses ဟာ ဝက်ဘ်ဆိုက်တစ်ခုထက် ပိုပါတယ်။ အသိပညာ မျှဝေရာ၊ မတူကွဲပြားတဲ့အသံတွေကို နားထောင်ရာ၊ အမြင်သစ်တွေ ရှာဖွေရာ၊ ကိုယ့်ကိုယ်ကိုယ် ပြန်လည်သုံးသပ်ရာနဲ့ အချင်းချင်း သင်ယူတိုးတက်ရာ နေရာလေးတစ်ခု ဖြစ်စေချင်ပါတယ်။

ဒီနေရာမှာ မျှဝေတဲ့ စာတစ်ပုဒ်က လူတစ်ယောက်ရဲ့ နှလုံးသားကို ထိတွေ့နိုင်မယ်၊ အတွေးတစ်ခုက အမြင်သစ်တစ်ခုကို ဖွင့်ပေးနိုင်မယ်၊ သင်ခန်းစာတစ်ခုက မျှော်လင့်ချက်လိုအပ်နေသူကို ခွန်အားပေးနိုင်မယ်၊ ဒါမှမဟုတ် လူတစ်ယောက်ရဲ့ ဘဝလမ်းကို အနည်းငယ်ဖြစ်စေ ပိုမိုတောက်ပစေနိုင်မယ်ဆိုရင်—အဲဒါဟာ Voices & Verses ကို ဖန်တီးရခြင်းရဲ့ အဓိကရည်ရွယ်ချက်ဖြစ်ပါတယ်။

မေတ္တာဖြင့်

Dr. L

Director

Voices & Verses LLC.

Connecticut, USA.

Please Note:

The articles and blog posts on Voices & Verses are written primarily from a Myanmar cultural and social perspective, reflecting the experiences, values, and realities of Myanmar communities.